Los asturianos en Valencia piden entainar ayudes 

Los afectaos comparten la so resignación por una reconstrucción lenta

Mañana cúmplense yá dos meses de la dana de Valencia, los asturianos residentes nes zones afectaes manifiesten el cansanciu y resignación de la población que nagua por recuperar una normalidá que va tardar en llegar. Comparten la tristura pola lentitú pa llegar a les ayudes, y falen d'una reconstrucción lenta.

Cruciar el nuevu calce del Turia llévate al ablayamientu d'estes escombreres qu’axunten folla, oxetos y alcordances. Les semeyes, vinilos y demás pertenencies de José Vicente Alonso y la so novia perdiéronse ente la folla qu'anubrió'l so pisu hipotecáu n’Alfafar. Cúntanos per teléfonu que viven na resignación, con ayudes que lleguen a cuentagotes, mientres intenten faer habitable la so casa.

Les aseguradores piden semeyes de coches desapaecíos. José busca'l suyu, una quimera atopalu nestos cementerios del desastre.

Dos meses dempués, la folla seco enllena les cais de los 70 conceyos afectaos qu'arrodien Valencia. Ellí siguen llimpiando y sacando llimu de los entesuelos y baxos, como nos amuesen Jesús y Diego, testigos dende'l so llar, nun sestu, del traxín d'una reconstrucción, que s'espera abondo lenta pa una población traiste y galdida.

Esta pareya son los asturianos de Catarroja. El so puestu solidariu fízo-yos ganar el ciñu de los vecinos, que ven nos voluntarios un reflexu d'humanidá.